आँखै अगाडि बुबा एक्कासि ढल्नुभयो – शशिन्द्र महर्जन (सहिद लनबहादुरको छोरा) (भिडियो सहित)

शशिन्द्र महर्जन २०४६ सालको जनआन्दोलनमा सहभागी किशोर र सहिद पिताका पुत्र हुनुुहुन्छ । पञ्चायती शासन व्यवस्थाको विरुद्ध भएको सो आन्दोलनको लहरले अन्यत्र जस्तै काठमाडौँको कीर्तिपुरलाई पनि तरङ्गित बनाइसकेको थियो । चैतमा त्यहाँ ठुलो आन्दोलन भयो । चैत २० गते कीर्तिपुरवासीसँग प्रहरीको झडप भयो र गोली चल्यो । गोली लागेर चार जना सहिद भए । सहिदहरूमा ४० वर्षका लनबहादुर महर्जन, २३ वर्षका राजमान माली, २२ वर्षका हीराकाजी महर्जन र १८ वर्षका राजेन्द्र महर्जन पर्नुहुन्छ । लनबहादुर शशिन्द्रका पिता हुुनुहुन्छ । उहाँ त्यतिबेला हिमाल सिमेन्ट कम्पनी चोभारमा काम गर्नुहुन्थ्यो ।

शशिन्द्रका अनुसार, जनआन्दोलनका बेलातिर कीर्तिपुरमा चारपाँच जना युवाको समूह देख्नै नहुने, प्रहरीले पक्राउ गरिहाल्थ्यो । कारण थियो, त्रिभुवन विश्वविद्यालय, केन्द्रीय क्याम्पस कीर्तिपुरको अवस्थिति र चहलपहल । जनआन्दोलनताका कीर्तिपुर क्याम्पसमा आन्दोलन, विरोधका कार्यक्रमहरू भइरहन्थे । त्यसले गर्दा कीर्तिपुरका स्थानीयवासीलाई पनि प्रहरीले निगरानीमा राख्थ्यो ।

चैत २० गते त चार जना स्थानीय युवालाई पक्राउ नै गर्‍यो । शशिन्द्र त्यो दिनको घटना सम्झिँदै भन्नुहुन्छ, “उहाँहरूलाई छुटाउन छरछिमेक गए, प्रहरीले नछोडेपछि अवस्था तनावग्रस्त बन्यो ।” उहाँका अनुसार, त्यतिबेला कक्षा ९ मा पढ्ने उहाँ आफ्ना बाजे र बुबासँगै कौसीमा बसेर खाजा खाइरहनुभएको थियो । त्यो घटना उहाँको घर अगाडि नै भएकाले बुबा सडकमा निस्कनुभयो । बुबासँगै आफू पनि सडकमा गएको शशिन्द्र सम्झनुहुन्छ । कीर्तिपुरको कुटुझोल भन्ने ठाउँमा भएको घटना थियो यो ।

शशिन्द्रका अनुसार, अरू मान्छेहरू पनि घरघरबाट कुटो, कोदालो जस्ता औजारहरू लिएर निस्किएका थिए । प्रहरीले एकैछिनमा टियर ग्यास छोड्न थाल्यो । उहाँ भन्नुहुन्छ, “हामी आँखामा पानी हाल्न थाल्यौँ । तर, आँखै अगाडि बुबा एक्कासि ढल्नुभयो ।” सुरुमा गोली लागेर हो कि के भएर हो बुबा ढल्नुभएको भन्ने नै उहाँलाई थाहा भएन । गोली कताबाट आयो भन्ने पनि आफूलाई थाहा नभएको शशिन्द्र बताउनुहुन्छ ।

जनआन्दोलन–२०४६ सफल भएको अहिले ३३ वर्ष पुगिसकेको छ । यसै सन्दर्भमा ‘सन्धान’ ले शशिन्द्र महर्जनको जीवनमा जनआन्दोलनले छाडेको छाप र बुुबा गुमाउनुपर्दाको भोगाइलाई समेटेर ल्याएको छ । उहाँ आफू समेत सहभागी भएको आन्दोलनमा बुबालाई गुमाउनुभएका एक प्रतिनिधि पात्र पनि हुुनुहुन्छ । उहाँसँग हामीले आन्दोलनका बेलाको महत्त्वपूर्ण स्मरणका साथै बुबाको निधनबाट परिवारमा एक्कासि आइपरेको दुःखपूर्ण परिस्थितिलगायतका विषयमा कुराकानी गरेका छौँ । प्रस्तुत छ, सन्धान का तर्फबाट गार्डिका बज्राचार्य र मुकुन्द बोगटीले शशिन्द्र महर्जनसँग गर्नुभएको कुराकानीको सम्पादित अंश :